Меккедегі Қағба қайта жөндеуден өткен соң «қара тасты» өз орнына қою абыройына ие болғысы келген меккеліктер арасында үлкен дау туып, қылыштарын қынабынан суыруға шақ қалып еді. Соңында ортақ бір мәмілеге келіп: «Қағбаға алғаш келген адамның сөзіне тоқтайық» деп уағдаласты. Осы уақытта меккеліктердің мұндай келісімінен мүлдем хабарсыз Пайғамбарымыз (с.ғ.с.) Қағбаның табалдырығынан аттайды. Оның (с.ғ.с.) нұрлы жүзін көрген меккеліктер қуаныштарын жасыра алмай: «Әмин» келе жатыр, - деп, Оның төрелігіне риза екендіктерін білдірген еді.